Andorra er eit lite land som ligg i Europa. Landet grensar til Frankrike og Spania. Hovudstaden som heiter Andorra la Vella, er 1022 meter over havet og er Europas høgast liggjande hovudstad .
Andorra
Faktaboks
- Hovudstad
- Andorra la Vella
- Innbyggjartal
- 85 000 (2023)
- Storleik
- 470 km²
- Statsform
- monarki
- Statsoverhovud
- Frankrikes president og biskopen av Seo de Urgel i Spania
- Språk
- katalansk
- Nasjonaldag
- 8. september
- Valuta
- euro
Natur og klima
Andorra har ikkje grenser mot hav og er om lag like stort som Oslo. Landet ligg sør i fjellkjeda Pyreneene. Andorra er i areal det sjette minste landet i Europa.
Det er mange høge fjell i Andorra. Det høgste fjellet heiter Pic de la Pedrosa og ligg 2943 meter over havet. Det er også skog, dalar, nokre innsjøar og ei elv som renn gjennom landet.
Steinbukk er nasjonaldyr. Det lever også røyskatt, villgeit, hjort, kongeørn og vandrefalk i landet.
Andorra får straum og energi både frå fossilt brennstoff og fornybare energikjelder.
Landet har varme somrar, medan det kjem mykje snø i fjella om vintrane.
Folk og kultur
Halvparten av befolkninga er andorranarar. Det bur også folk frå Spania, Porutgal og Frankrike i landet.
Nær 90 prosent av menneska bur i byar. Katalansk, som også mange folk i Spania snakkar, er offisielt språk. Mange snakkar også spansk og fransk. Kristendom den største religionen.
Grunnskulen er gratis, og alle barn må gå på skule frå dei er 6 til 16 år. Det finst eitt universitet i landet.
Fotball, alpint og sykling er populære idrettar blant barn og ungdom.
Politikk og økonomi
Andorra er eit fyrstedømme der den spanske biskopen av Urgel og den franske presidenten er landets statsoverhovud. Det er det einaste landet i verda som har to «kongar». Landet er eit demokrati. Det er statsministeren og regjeringa som styrer landet.
Spania og Frankrike er ansvarleg for utanrikspolitikken og det militære i landet. Det er vanskeleg å få statsborgarskap i Andorra. Halvparten av befolkninga er ikkje statsborgare i landet.
Mange menneske i Andorra jobbar med turisme, handel og helse. Landet tener mellom anna penger på å selje møblar, medisinar og skinn til andre land.
Andorra er medlem av mellom anna FN og Europarådet.
Historie
Det er funne 12 000 år gamle spor etter menneske i området som no er Andorra. Andorra blei grunnlagd som eit samarbeid mellom kongen av Frankrike og biskopen av Spania i 1278.
Frå 1278 og fram til 1993 var fyrstedømmet delt mellom Frankrike og den spanske biskopen. I 1993 blei Andorra sjølvstendig og eit demokrati. Same år blei Andorra også medlem av FN.
Andorra har i dag høg inntekt og eit godt helsevesen. Kvart år besøker også mange turistar landet.