Det er fleire språk i Noreg, men norsk er det største språket. I tillegg er det tre samiske språk som blir brukt i delar av landet.
Noreg har òg fleire språk som blir brukt av mindre grupper og som er anerkjent som nasjonale minoritetsspråk. Dette er teiknspråk, kvensk, romanes og romani.
Samar har status som urfolk i Noreg. Samisk og norsk har formell status som likeverdige språk i Noreg.
Samisk er ikke eitt språk, men ein språkfamilie. I Noreg finst både nordsamisk, lulesamisk og sørsamisk. Nordsamisk er mest brukt. Det er også nokre få som snakkar skoltesamisk, pitesamisk og umesamisk.
Frå 2009 har norsk teiknspråk vore rekna som eit fullverdig språk i Noreg. Teiknspråk er språk som nyttar rørsler og teikn. Teiknspråka er ulike frå land til land. Omlag 4000 personar nyttar norsk teiknspråk.
Så langt tilbake i historia ein kjenner til har det komme innvandrarar til Noreg som snakkar andre språk. Det har mest vore frå dei andre skandinaviske landa, og frå Tyskland og Storbritannia. I dag finst det mange i Noreg som har eit anna morsmål. Det er til dømes språk som arabisk, polsk, somali, urdu, spansk og ukrainsk.
Frå midten av 1800-talet ønskte den norske staten å fornorske fleire av minoritetane. Då forsøkte dei å få minoritetane til å bli som nordmenn. Språka blei hardt undertrykt, og det var for eksempel ikkje lov til å snakke samisk på skulen. Færre og færre kunne både samisk, kvensk og romani.
Frå andre halvdel av 1900-talet har samane kjempa sterkt for å ta tilbake kulturen og språket sitt. Mykje er gjort for å styrke dei samiske språka. Likevel er dei framleis truga.
I 2005 fekk kvensk status som eit eiga språk i Noreg. Etter dette har kvenske organisasjonar arbeidd for å lage eit eige kvensk skriftspråk.
