Sverige

Nestan ti prosent av Sverige består av innsjøar og elver. Den største innsjøen er Vänern, som er 5450 km². Over halvparten av landet er dekt av barskog med gran og furu. Det høgaste fjellet er Kebnekaise, som er 2106 meter høgt.

Dyrelivet er ganske likt det som finst i Noreg, men det lever fleire rovdyr, som bjørn, ulv, jerv og gaupe, der. Heilt sør i landet finst det dyr som ikkje lever vilt i Noreg, for eksempel moldvarp, kanin, hasselmus og dåhjort.

Klimaet er ulikt i dei ulike delane av landet. I nord er vintrane kalde med mykje snø. Somrane kan vere varme. Sør i Sverige er klimaet mildare heile året.

Sverige er det landet i Norden der det bor flest menneske. Dei fleste bur i byar og tettstader. Det bur nesten 2,4 millionar menneske i og rundt Stockholm. Nord i landet bur det derimot ganske få.

Sverige har høg levestandard, og dei fleste lever lenge. Landet har eit av dei beste systema for velferd i verda.

Alle barn har rett til å gå på skulen frå dei er 6 til 15 år gamle. Dei aller fleste held fram på vidaregåande skule.

Forfattaren Astrid Lindgren og aktivisten Greta Thunberg kjem frå Sverige. Den svenske oppfinnaren Alfred Nobel fann opp dynamitt. Han stifta også dei kjende Nobelprisene med nokre av pengane han tente.

Sverige er eit monarki og har konge som statsoverhovud. Kongen har inga politisk makt. Det er Riksdagen som bestemmer i landet, det er det same som Stortinget i Noreg.

Sverige er medlem av FN. Landet har vore medlem av EU sidan 1995. Sverige vart medlem av NATO i 2024.

Sverige tener mykje pengar på industri og på å selge varer og tenester til utlandet. Ikea og Volvo er kjende merke som kjem frå Sverige.

Frå midten av 1200-talet vart Sverige samla til eitt rike.

Sverige var med i Kalmarunionen saman med Noreg og Danmark frå 1397 til 1521. I 1523 vart Sverige eit eige land og Gustav Vasa vart vald til konge.

Sverige og Noreg var i union frå 1814 til 1905. Det har vore mange krigar mellom Noreg og Sverige, men ingen etter 1814.

Under andre verdskrigen valde ikkje Sverige side, dei ville vere nøytrale. Dei hjelpte likevel til med å sende mat og hjelpe dei som sat i tysk fangenskap. Dei tok også i mot flyktningar frå Noreg og Danmark.

Sverige og Noreg har alltid samarbeidd mykje. Landa kjøper og sel mange varer til kvarandre.

'Svenskehandel' er når dei som bur i Noreg dreg til Sverige for å kjøpe mat, godteri og alkohol fordi det er billigare i Sverige.

• Europa
• svensk
• monarki
• Kalmarunionen