Isaac Newton var ein viktig engelsk matematikar og fysikar. Mykje av det ein lærer på skulen i matematikk og fysikk, kjem frå ting han oppdaga.
Isaac Newton
Faktaboks
Sir Isaac Newton
- Fødd
- 4. januar 1643, Woolsthorpe, Lincolnshire i England
- Død
- 31. mars 1727, London
Bakgrunn
Newton blei fødd i England og var son av ein bonde. I 1661 byrja han å studere matematikk ved universitetet i Cambridge. Då universitetet i nokre år blei stengt på grunn av pest, studerte han sjølv heime.
Han elska å eksperimentere og finne svara sjølv. Han meinte det var betre enn at andre skulle fortelje han kva som var rett og gale.
Spektralfargene
Newton gjorde ei viktig oppdaging ved hjelp av eit teleskop. Eit teleskop er ein kikkert som blir brukt for å studere verdsrommet. Teleskopet forstørrar det som er langt borte. Når Newton kikka på ei stjerne som lyste sterkt gjennom teleskopet, så han ringjer i alle fargane i regnbogen rundt stjerna.
Astronomar som hadde sett det same, meinte at fargane kom av feil på linsa i teleskopet. Newton skjønte at det hadde noko med sjølve lyset å gjere. Han meinte at lyset var sett saman av bitte små bitar kalla partiklar. Han oppdaga også at kvitt lys er sett saman av alle fargane i regnbogen. Dette kalla han spektralfarger.
Newton skreiv om oppdaginga i boka Opticks, som blir rekna som den viktigaste boka om lys og fargar.
Newtons tre lover
Newton gjorde fleire andre viktige oppdagingar. Nokre av dei viktigaste blir kalla Newtons lover. Det er tre lover i fysikk som handlar om kraft og rørsle, og korleis ting flyttar på seg. Derfor blir dei også kalla rørslelovene.
Lova om tyngdekraft
Newton oppdaga og skreiv ned lova om tyngdekraft. Den lova gir ei forklaring på tidvatn og kvifor eit eple fell mot jorda. Lova forklarer også korleis planetane bevegar seg.
Alt dette skreiv han om i boka Principia. Denne boka var den viktigaste i fysikk og astronomi i mange hundre år.
Les meir i Vesle norske leksikon
- Newtons lover
- filosofi
- fysikk
- tyngdekraft