Dans er å bevege kroppen, gjerne til musikk. Når ein dansar beveger ein seg ofte i ein rytme.
Dans kan vere kunst, underhaldning, trening og leik. Ulike land og kulturar har gjerne ulike tradisjonar og typar dans.
Ein kan vere profesjonell dansar og ha dans som jobb, men ein kan òg ha dans som hobby.
Dans kan vere underhaldning eller kunst, for eksempel kan ein sjå ballett på scene. Dans kan brukast til å fortelje historier, vise fram situasjonar på ein ny måte eller utforske kjensler.
Dans er òg mykje brukt i film, musikal og på TV. Mange musikarar har dansarar med seg på scena for å gjere konsertane meir underhaldande.
Ein kan ha dans som fritidsaktivitet. Ein kan danse berre for gøy, eller ein kan trene dans meir målretta. Ulike dansetilbod har gjerne ulike mål. Nokon trenar for å bli best og delta i konkurransar. Andre er meir opptekne av å ha det kjekt med dans og bevegelse saman med andre.
Ein kan lære dans frå ein instruktør eller ein dansepedagog. Ein dansepedagog er ein som har studert eller jobba for å bli lærar i dans.
Dansetrening kan ein finne fleire stader:
Ein kan jobbe med dans på ulike måtar. Ein kan jobbe som dansar og framføre dansane på ei scene. Ein kan skape og arrangere dansar, då arbeidar ein som koreograf.
Det er ulike måtar å bli dansar på og ulike utdanningar for dansarar. Ein kan starte ei utdanning i dans på vidaregåande skule, om ein velger linja musikk, dans og drama. Der har ein dei vanlege fag som norsk og matte, men også eigne fag knytt til dans. Over 20 vidaregåande skular i Noreg har dansefag.
Ein kan også gå på danselinje på folkehøgskule, eller ein kan studere dans ved ulike akademi, høgskular eller universitet.
Dansens dag er 29. april.
