GPS

Det er mange måtar å bruke GPS på. Ein av dei vanlegaste er for å finne fram, med bil, sykkel, eller til fots. GPS-en finn ut kvar ein er, og så kan eit kartprogram rekne ut kva som er den raskaste vegen.

GPS blir òg brukt i aktivitetar utandørs, for eksempel jakt og å gå turar. GPS kan då brukast i staden for eller i tillegg til kart og kompass.

Her er nokre eksempel på kva ein kan bruke GPS til:

GPS kan brukast til å spore bilar, og andre transportmiddel for å finne ut kvar dei er og har vore. Det kan ein for eksempel bruke til å finne igjen stolne køyretøy. I bussar kan GPS brukast til å rekne ut fart og reisetid, for å varsle om bussen er i rute.

Ein kan òg spore kjæledyr for å finne dei om dei skulle bli borte. Ville dyr kan sporast for å lære om kvar dei beveger seg.

Mange datamaskiner og mobiltelefonar har innebygd GPS, slik at ein kan spore dei dersom dei blir borte.

GPS blir òg brukt i aktivitetar som løping, sykling, golf og å gå tur. Då kan ein registrere avstandar, ruter, kor lang tid ein brukar og kor fort det går.

I landbruk kan GPS for eksempel brukast for å styre traktorar og anna utstyr automatisk. Det er nyttig for å måle opp jorde, planleggje avlingar og finne igjen dyr som går fritt.

På havet blir GPS brukt av mannskap i båtar og på skip. Det er nyttig for å navigere og vite kvar ein er på havet. Nokre skip har automatisk styring etter GPS. GPS blir òg brukt for å oppgje nøyaktig posisjon til andre skip og hamner.

I militæret blir GPS brukt til å styre fly, dronar, tanks og mykje anna utstyr. Det blir òg brukt til å navigere og å spore posisjonen til soldatar og utstyr.

• kart
• navigasjon
• Jorda
• geografi
• breddegrad og lengdegrad