Noveller blir gjerne gitt ut som bøker der ein samlar fleire noveller. «Vinternoveller» er sett saman av tre noveller. Dei handlar det om å vere på rømmen med Valdresekspressen, om karaoke, kjøpesenter og snø.
«Tusenfryd» er ei samling noveller for ungdom. Samlinga er sett saman av åtte noveller. Novellene følgjer seks elevar i ein klasse gjennom eit halvt år.
Novelle er ei kort, oppdikta forteljing. Novelle er ein sjanger som høyrer til skjønnlitteraturen og den forteljande litteraturen. Novella kan likne på romanen i form og at ho er oppdikta, men novella er kortare.
Nokre døme på noveller er «Faderen» av Bjørnstjerne Bjørnson, «Karen» av Alexander Kielland og «Kan jeg bli med deg hjem» av Marie Aubert.
Handlingen i ei novelle går gjerne føre seg over kort tid, til dømes ein dag. Sidan novella er kort, må forteljaren berre ta med det viktigaste. Ofte har novella få personar, og ein får ikkje alltid vite så mykje om dei. Lesaren må gjerne tenkje seg til ting som ikkje er fortalt.
Mange noveller er bygd opp rundt eit vendepunkt. Det vil seie at noko plutseleg forandrar seg. Vendepunktet kan vere at hovudpersonen forstår noko som hen ikkje har forstått før, at det skjer noko uventa eller at sambandet mellom personane endrar seg.
Ingvild H. Rishøi, La stå, Vinternoveller
