døv

Det er mange årsaker til at ein person kan bli døv:

• Gena frå foreldra. Gen er det som formar kroppen og gjev han sitt særpreg. Samansettinga av gena gjer at ein person blir som hen blir.
• Infeksjonar hos mora medan ho er gravid.
• Infeksjonar eller sjukdommar i hovudet eller i eit øyre. Hjernehinnebetennelse er eit eksempel på ein infeksjon som ein kan bli døv av.
• Skadar i hovudet og hjernen.

Det er vanleg å høyre dårlegare når ein blir gamal.

Det finst mange ulike hjelpemiddel for døve. Kva behandlingar og hjelpemiddel som fungerer best, vil vere ulikt frå person til person.

Det har mykje å seie om personen har vore døv heile livet, eller om dei har blitt døve etter at dei har lært seg å snakke.

Ulike hjelpemiddel kan vere:

• Høyreapparat passar for dei som kan høyre litt. Apparatet forsterkar lydar, slik at personen kan høyre dei. Høyreapparatet ligg ofte utanpå øyret.
• Cochlea-implantat passar for dei som ikkje kan høyre noko med vanleg høyreapparat. Det blir operert inn i hovudet til personen. Implantatet fangar opp lyd i ein mikrofon, og sender desse lydane vidare til hjernen.
• Teiknspråk er nyttig både for folk med og utan høyrsel. I teiknspråk brukar einn hendene til å lage formar og bevegelsar for å uttrykke seg. Det er viktig at familien og andre personar ein har kontakt med, lærer seg teiknspråk, slik at ein kan kommunisere med kvarandre.
• Hjelp til å halde på talespråket. Denne typen behandling er veldig viktig for dei som har hatt høyrsel tidlegare. Talespråk er når ein brukar munnen og stemma til å snakke. Det krev trening å bruke stemma igjen når ein ikkje kan høyre seg sjølv.
• Øve på å lese på lepper. Leppene og munnen formar seg ulikt alt etter kva ord ein person seier. Viss ein øver, kan ein forstå kva nokon seier berre ved å sjå på leppene deira.

• høyrselshemming
• teiknspråk
• høyreapparat
• cochlea-implantat