Gustav Vigeland foran en skulptur i stein av to kvinner som danser.
Gustav Vigeland var ein norsk kunstnar. Han var bilethoggar, det vil seie at han laga skulpturar. Vigeland er ein av dei mest kjende bilethoggarane frå Noreg. Han er mest kjend for Vigelandsparken i Oslo.
Skulpturane laga Vigeland først i leire. Så blei nokre av dei hogd i stein. Andre blei det laga formar av så ein kunne støype dei i bronse.
Gustav Vigeland var frå Manda i Agder, der han først arbeidde som treskjærar. Seinare gjekk han på teikneskole. Gustav hadde ein bror som heiter Emanuel Vigeland, som også blei kunstnar.
Haustutstillinga i Oslo i 1889 var første gong Vigeland fekk vist eit av kunstverka sine.
Frå 1897 til 1902 arbeidde han med skulpturar på Nidarosdomen, den store kyrkja i Trondheim. Seinare laga han portrett av kjende folk som Camilla Collett og Henrik Wergeland. Han var også i Paris i Frankrike, der han blei inspirert av bilethoggaren Auguste Rodin.
Dei siste førti åra av livet hans handla mest om å skape Vigelandsparken på Frogner i Oslo. Her gav Oslo kommune han plass til både å lage og å stille ut skulpturane sine. Til gjengjeld fekk kommunen arve det han skapte.
Vigeland fylde heile den digre parken med skulpturar. Dei fleste er av menneske og er laga av granitt eller bronse. Stilen er massiv, med store, jamne og runde formar.
I midten av Vigelandsparken står Monolitten. Han er 17 meter høg og har 121 menneskefigurar som klyngar seg i hop. Monolitten er hogd ut av éin diger blokk granitt, som er ein veldig hard type stein. Vigeland laga modeller, men det var steinhoggarar som gjorde jobben. Det tok 14 år å gjere skulpturen ferdig, frå 1929 til 1943.
Vigelandsparken var ein stor og viktig jobb for Gustav Vigeland. I dag er parken ein open offentleg park. Mange turistar i Oslo drar dit. Like ved parken ligg eit museum der Vigeland arbeidde og budde.
