Tyngdekrafta dreg eplet ned mot Jorda. Det er også tyngdekrafta som får Månen til å gå i bane rundt Jorda.
Vekt beskriv kor tungt noko er. Vekt blir ofte målt i kilogram (kg) eller gram (g).
Eit kilogram er lik tusen gram. Til dagleg kallar ein ofte eit kilogram for ein kilo. Ei anna vanleg vekteining er tonn. Eit tonn er tusen kilogram.
Veldig lette ting blir ofte målt i milligram (mg). Eitt milligram er eitt tusendels gram.
Måleininga hektogram (hg) er også i bruk. Det er hundre gram. Til dagleg seier ein ofte hekto i staden for hektogram.
At ein ting har tyngd og vekt kjem av at tyngdekrafta verkar på ho. Jordkloden trekkjer på alle ting, og tyngdekrafta gjer at alle ting trekkjer på kvarandre. Jo større ting, jo større tyngdekraft.
Månen er mykje mindre enn Jorda. Tyngdekrafta på Månen er berre ein seksdel av tyngdekrafta på Jorda. Ein ting som veg 60 kilo på Jorda, vil vege 10 kilo på Månen. Jupiter er ein planet som er mykje større enn Jorda. Der vil den same tingen vege 152 kilo.
I fysikk skil ein mellom tyngd og masse. Her måler ein tyngd med ei eining for kraft som blir kalla newton, medan masse blir målt med gram og kilo. I dagleglivet skil ein ikkje mellom tyngd og masse på same måte.
Kopi av loddet i Paris frå 1889. Det originale loddet ligg innelåst i ein kvelv.
Tidlegare blei måleininga kg definert som vekta av eit bestemt lodd som blei oppbevart i Paris. Noreg og mange andre land hadde ein kopi av dette loddet.
I dag blir ein kilo definert ved hjelp av moderne fysikk.
